Posted on: Sat 11-July-2009
कार्यक्रमलाई सम्बोधन गर्नुहुदै राजदूत महामहिम डा. गणेश योन्जन तामाङ्गले भौगोलिक रुपमा भिन्न भए पनि सामाजिक, धार्मिक र सांस्कृतिक रुपमा सामीप्यता राख्ने नेपाल र जापान वीचको सरकारी सम्बन्ध आरम्भ हुनुभन्दा झण्डै छ दशकअघिनै जनस्तरमा सम्बन्ध सुरु भइसकेको थियो भन्नु भयो । महासागरको वीचमा मूल्यवान मोतीझैं रहेको जापान र हिमालयका काखमा सुन्दर फूलझैं रहेको दुई राष्ट्रबीचको सम्बन्ध घनिष्ठ र सुमधुर रहेको छ भन्नुहुंदै महामहिम डा. तामाङ्गले नेपाल प्रकृति र संस्कृतिको एउटा सुन्दर र रोमाञ्चक सङ्गम हो भन्ने धारणा व्यक्त गर्नु भयो । विश्वलाई शान्ति, अहिंसा, सह-अस्तित्व र मानवताको सन्देश प्रवाहित गर्नुहुने भगवान गौतम बुद्धले नेपालको पवित्र भूमि लुम्विनीमा जन्म लिनु भएकाले नेपाल संसारकै महान् तर्ीथस्थलका रुपमा स्थापित र सम्मानित राष्ट्र भएको छ भन्नु हुंदै महामहिम नेपाली राजदूतले विश्वको सर्वोच्च शिखर सगरमाथा लगायत उच्च हिमशिखरहरु, हजारौं प्राकृतिक नदी, झर्ना र तालतलैया भएको मुलुक नेपाल विश्वको एक लोकप्रिय, आकर्ष र प्रमुख पर्यटन केन्द्रका रुपमा विकसित भइरहेको छ भन्नु भयो ।
कार्यक्रममा होक्काईडो गभर्नरका प्रतिनिधिका रुपमा महानिर्देशक श्री Tatsuo Shibata ले नेपाल र जापानवीचको सम्बन्ध सरकारीस्तरमा मात्र सीमित नरहेर जनस्तरमा पनि विकसित भइरहेको छ भन्नुहुंदै होक्काइडो प्रान्तवाट हजारौं जापानीहरु वर्षोनी नेपाल भ्रमणमा जानु यसको ज्वलन्त प्रमाण हो भन्नुभयो । सामाजिक, धार्मिक र सांस्कृतिक समानता एवं शान्ति र अहिंसाप्रतिको प्रतिवद्धता नेपाली र जापानी जनताका विशेषता हुन् भन्नुहुंदै श्री Shibata नेपालका प्राकृतिक, सांस्कृतिक र धार्मिक स्थलहरुको परिचय र विशेषता झल्काउने यस्ता कार्यक्रमहरुले जापानी जनताहरुमा नेपाल र नेपालीप्रति आकर्षा र सद्भावना पैदा गर्ने महत्वपूर्ण कदम हुनसक्ने विचार व्यक्त गर्नु भयो । कार्यक्रममा श्री Shibata ले टोष्ट प्रस्ताव गर्नुहुंदै नेपाल मिलनसार, सहिष्णु, आतिथ्यता र आत्मीयताले भरिपूर्ण नेपाली जनताहरुको पवित्र भूमि हो र प्रकृति, पर्व एवं परम्पराहरुले यो देशलाई आकर्ष र जीवन्त बनाएको छ भन्ने भावना व्यक्त गर्नुभयो । विश्वको सर्वोच्च शिखर सगरमाथा र वुद्धको पवित्र जन्मस्थल लुम्विनीलगायत विश्व सम्पदामा सूचीकृत सात सांस्कृतिकस्थलहरु भएको नेपाल पदयात्रा र पर्वतारोहणकालागि पनि प्रसिद्ध छ भन्नुभयो । श्री Shibata ले शान्ति, आनन्द र प्राकृतिक दृश्यावलोकनका लागि नेपाल अनुपम भूमि हो भन्नुभयो । कार्यक्रममा महामहिम राजदूत डा. तामाङ्गले होक्काईडो विश्वविद्यालय नेपाली विद्यार्थी संगठनव्दारा प्रकाशित वाषिर्क मुखपत्र “होकुदाइ बिसौनी’’ को २०६६ सालको नयां अङ्कको लोकार्पण गर्नुभयो । राजदूतावासका सहचारी श्री कृष्ण थापाले स्वागत भाषण गर्नु भएको उक्त कार्यक्रममा नेपाली संस्कृति झल्कने नृत्य सहितको सांस्कृतिक कार्यक्रम लगायत हिमाल आरोहण सम्बन्धी बृत चित्र पनि प्रस्तुत गरिएको थियो । समारोहमा जापान-नेपाल सोसाइटीका अध्यक्ष श्री Arita Kazunori होक्काईडो विश्वविद्यालयका एसोसियट प्रोफेसर डा. पीताम्वर गौतम र गैर आवासीय नेपाली संगठन, होक्काईडो शाखाका अध्यक्ष श्री अर्जुन अधिकारीलाई महामहिम राजदूतज्यूले उहांहरुले जापानमा नेपालको नाम र प्रतिष्ठा बढाउन र नेपालको पर्यटन प्रवर्द्धन गर्न योगदान पुर्याउनु भएवापत धन्यवाद व्यक्त गर्नु भएको थियो । कार्यक्रमको अन्त्यमा नेपाली परिकारसहितको रात्रिभोजको आयोजना गरिएको थियो ।
होक्काइडो भ्रमणका क्रममा राजदूत डा. तामाङ्गले जुलाई १० का दिन होक्काईडोका साप्पोरोका मेयर महामहिम श्री Fumio Ueda र भाईस गभर्नर महामहिम श्री Kunihiko Yamamota लाई क्रमशः साप्पोरो महानगरपालिका र गभर्नरको कार्यालयमा शिष्टाचार भेट गर्नु भयो । शिष्टाचार भेटका क्रममा महामहिम डा. तामाङ्गले दुई मित्र राष्ट्रका वीचको सम्बन्धलाई जनस्तरमा बृद्धि गर्नु आजको आवश्यकता हो भन्नुभयो । उहांले आफ्नो भ्रमण त्यसै दिशामा एक सार्थक पाइला हो भन्नुभयो । होक्काईडोबाट प्रशस्त जापानीहरु वर्षोनी नेपालको भ्रमणमा जाने गरेका छन् भन्नुहुंदै राजदूत डा.तामाङ्गले नेपाली उत्पादनका सामानहरु चिया, कफी, वीयर, हस्तकलाका सामग्रीहरु र काठ र चांदीका बस्तुहरु, कार्पेट र उनी लत्ताकपडाहरु जापानको बजारमा भित्र्याउनु र लोकप्रिय गराउनु पनि आवश्यक भएको छ भन्ने धारणा व्यक्त गर्नु भयो । साथै सोही दिन सांझ होक्काईडो विश्वविद्यालयमा अध्ययनरत विद्यार्थीहरु, विभिन्न व्यवसाय गरी वसेका नेपालीहरुलगायत एनआरएन होक्काईडो शाखाका पदाधिकारीसहितको पहलमा एक अन्तर्कृया र रात्रिभोजको आयोजना गरिएको थियो । उक्त कार्यक्रममा होक्काईडोका नेपालीहरुले भोगिरहेका विविध अनुभवहरु र सुझावहरु राख्नु भएको थियो । उक्त कार्यक्रममा महामहिम राजदूत डा. तामाङ्गले यी सुझावहरुलाई समाधान गर्ने दिशामा दूतावास प्रयत्नशील रहनेछ भन्ने वचन दिनु भयो साथै दूतावासका वर्तमानका गतिविधिहरुमा प्रकाश पार्नुहुंदै महामहिम राजदूतज्यूले राहदानी र कन्सुलरसम्बन्धी कार्यहरु अविलम्ब सम्पादन गरिने व्यवस्था भएको र जापानका जुनसुकै शहरमा बसेका नेपालीहरुको भावनालाई आत्मसात गरि सहकार्य गर्दै जाने विश्वास दिलाउनु भयो ।
यसै गरी जुलाई १२ को सांझ गैर आवासीय नेपाली संगठन, होक्काइडो शाखाको सहयोगमा राजदूतावासले होक्काइडोको अर्को प्रसिद्ध सहर आवासिरीमा नेपाल र नेपालीहरुको शुभ चिन्तक जापानी मित्रहरु विच एक अन्तक्रिर्यात्मक कार्यक्रमको आयोजना गर्यो । कार्यक्रमलाई सम्बोधन गर्नुहुंदै महामहिम राजदूत डा. तामाङ्गले होक्काइडोका सुन्दर स्वच्छ पहाडहरु, चिसो मौसम, सफा नीलो आकाश र न्यानो आत्मीय आतिथ्यले हामीलाई हाम्रै नेपालमा पुगेजस्तो अनुभूति भइरहेको छ भन्नुभयो । हाम्रा धार्मिक र सांस्कृतिक मूल्य र मान्यता एवं शान्ति र अहिंसाप्रतिको हाम्रा आस्था र विश्वासले नेपाली र जापानी जनतावीचको सम्बन्धलाई सुदृढ आधार प्रदान गरेका छन् भन्नुहुंदै महामहिम नेपाली राजदूतले फुर्सद र बचेको पैसाले संसारका विभिन्न मुलुकहरु घुमिरहने जापानी दाजुभाइ दिदीबहिनीहरुले प्रकृति, संस्कृति र सभ्यताको त्रिवेणीजस्तो अनुपम राष्ट्र नेपाल जहां अतिथिहरुलाई देवतासरह मान र मर्यादा गरिन्छ, पुगेर अध्ययन र अवलोकन गरी शान्ति र आनन्द प्राप्त गर्नु महत्वपूर्ण हुने विचार व्यक्त गर्नु भयो । कार्यक्रमलाई सम्बोधन गर्नुहुंदै होक्काईडोका सांसद श्री Katsuya Tadashi ले नेपाल अव जापानमा नयां र अपरिचित छैन र एकपटक नेपाल पुगेकाहरुले आफू दोस्रो पटक नेपाल जान चाहन्छन् र नपुगेकाहरुलाई नेपाल जान उत्प्रेरित गर्दछन् भन्नुभयो । नेपालमा हिमाल मात्र छैनन् भन्नुहुंदै श्री Tadashi ले त्यहां हिमाली संस्कृति पनि छ , त्यो अध्ययनीय, रोचक र जीवन्त छ भन्ने विचार व्यक्त गर्नु भयो । नेपालमा सुन्दर प्रकृति मात्र होइन, जीवन्त संस्कृति पनि छ भन्नुहुंदै श्री Tadashi ले एशियाली राष्ट्रहरुमा नेपाल एकपटक पुग्नै पर्ने र एकपटक पुगेपछि दोस्रो पटक घुम्नै पर्ने मुलुक हो भन्नुभयो ।उक्त कार्यक्रममा सांसद,उद्योग वाणिज्य संघका पदाधिकारी, पत्रकार लगायत नेपालको भ्रमण गरिसकेका जापानीहरुको उपस्थिति थियो ।
